Елена Елькина
Михаил Якимов
Оля Арзамасова
Мария Орлова
София Чиркова
Александра Шкляева
Елизавета Шихова
Елена Елькина (Алнаш ёрос, Кузьымгурт)
ВАНЬЗЭ ГЫЛТОЗ ЗОР
Верос
Гужем куазен кын зор усе. Шапыкъёс йӧ кадесь, кызь вить градус шунытэн соос эшшо но кезьытэсь пото. Куинетӥ нуналзэ ини ву шуккиське укноосы, пазьгиське но ӟу-у-з вия пияла вылтӥ. Зор сӥятӥз пӧсь гужемлэсь ӟырдыт шундызэ, пыжем улосэз, адямиослэсь мылкыдзэс.
Дас нунал азьло туж шулдыр вал. Катя ӵукна вазь сайказ, мылкыдзэ буйгатэмез луымтэен умме усьыны ӧз быгаты ни. Ог час пала уйжомыса кыллиз валесаз. Котькуд ӵукна сямен, аслыз ачиз шумпотыса учкиз шонер пул кадь кыстӥськем векчи кӧтыз шоры. Лулпуштӥз ортчиз ненег капчи тӧл. Катя мынектӥз.
Нуназе бере нылпиос вуизы ини шутэтскон лагере. Котькуд аре сямен, Катя нош ик татчы вуиз. Эшъёсыныз пумиськон, выль тодматсконъёс, тодэ ваёнъёс кутскизы ини кык час ӵоже автобусын мыныкузы. Лагерьысен утыр ваньзы, отрядъёсын люкаськыса, кенешъёсы бичаськизы.
Лагерь — тунсыко инты. Со аспӧртэмлыко выжыкыл дунне, кудӥз улонын кельтэ яркыт малпанъёс. Нырысь нуналъёсаз ог-огедлэсь кепыран, дышымтэ улсын вераськытэк улон возиське, нош берло эшъёстэ гажаны кутскиськод но — бертоно. Таиз лагерь кыстӥськоз сизьым нунал. Тямысэтӥяз — доре. Катя со нуналэз туж уг яраты, выжыкылэныз люкиськемез уг поты.
Вожатоез туэ Оля студентка. Катя сое умой тодэ, соос татысен ортчем гужеме тодматскизы. Тросэз эшъёсыз лыктӥллямтэ, кин ялкарыны Муское гылӟем, кин мукет шутэтсконние, кин дораз кылем. Оля герӟа Катяез азьло аръёсысь тодэ ваёнъёсыныз, эшъёсыныз, соин но нырысетӥ нуналаз ик нылаш понна дуно эш луиз.
Сиськонние мынэм бераз ик, шӧдтэк шорысь Катялэн син шораз усизы удмурт эшъёсызлэсь пӧртэмесь нылпиос: начаресь, ӝужытэсь, сайкыт но югыт синмо, тӧдьы, куренялэс йырсиё.
Мар эшшо вал на та нылпиос бордын сыӵеез, кудӥз вырӟытӥз Катялэсь лулзэ, уськытӥз сое малпаськонэ, со ачиз но вераны ӧй быгатысал. Нош ужпум вал одӥгез пияш бордын. Кыкетӥзэ соин пумиськыкуз, Катя шӧдоз, кызьы сое югыт йырсиё ӟуч пияш доры кыскоз, кыскоз соку ик, ку Катя соин сиськонниысь потыкуз ӵош тупалоз. Кыскоз сыӵе зол — нылаш котькуд минут малпалоз лыз синмо пи сярысь. Катя синмаськиз. Нырысьсэ адӟыса, мар соин ноку но азьло ӧй вал. Кельыштыриз сое, кин лыктӥз туж кыдёкысь уйпалась пичи городысь. Сое, кинэн со вераськыны но ӧз дӥсьты. Вань нуналъёссэ Катя ортчытӥз со сярысь малпаса: ӵукнаысен ӝытозь со тыршиз пумиськыны, вӧзаз возиськыны, котъкуд ужрадын утчаз солэсь синъёссэ. Чебересь, муресь но туж: мӧзмытэсь чимыоссэ…
Ӧз, Катя ӧз мыны тодматскыны. Оло сое кутӥз азьло нокинэн пияшъёсын эшъяськымтэез, оло ӟучезлэн шыпыт, ас дуннеяз, мӧзмыса, улэмез, оло лагерьысь нылпиослэсь возьдаськон. Нош Катя одӥг позырьяськонын но ӧз мыны вераськыны яке эктыны ӧтьыны. Пӧртэм нылъёс соин кален эктонын бергазы, нош со, нокыӵе кариськытэк, вань ӧтисьёсын потэ, пал кыл но вератэк эктэ но озьы ик люкиське. Катя гинэ матэктыны кышказ, ӧз быгаты.
Ог нунал легерьын ялэмын вал яратӥсьёслэн нуналэнызы. Егитъёс быгатӥзы эшъёссылы но яратонъёссылы ящикъёсы лушкем гожтэтъёс куяны. Катя малпаз: ӝыт позыръяськонын одно ик ӟуч пияш доры мыноз но чик кепыратэк сётоз солы гожтэтсэ. Малпамын — лэсьтэмын. Чидатэк витиз ӝытазез, нош ӝыт мынӥз дораз. Сюлмыз йыгаськиз, ньылоныз куасьмиз, йырыз берганы кутскиз. Пияшез шӧдтэк шорысь вераськыны кутскиз:
— Лагерь пумозь кылиз на куинь нунал. Мон ӝоген кошко. Малы тон утчаськод на монэ?
Катя могӟиз. Мар малпаны но вераны тодытэк, со, ваньзэ валасько шуыса, берыктӥськиз но кошкиз. Аслыз ик берыктэм гожтэтсэ нюлам кырымпыдэсаз погмаса, пыриз комнатаяз, мырдэм лэзиськиз валес вылаз, синкылизэ кутэмез луымтэен ватӥз ымнырзэ.
Ог дас вить минут ортчыса кесям бумага пырыен-пырыен каллен усиз жаг куянэ…
Бертон нунал азьын ӝытаз бадӟым тылскем ӝуато. Со котырын ик ортчыто берпуметӥ позыръяськонэз. Отрядъёс кема пуко вераськыса, люкиськон азьын усьто сюлэмъёссэс. Та ӝыт ваньмыз понна туж ӝожмыт луэ.
Катя, номыр шоры учкытэк, ӟуч эшсэ эктыны ӧтьыны малпаз. Куинь минут ӵоже крезьгур шудытозь синъёсаз вал чылкыт но курыт синву: шумпотон но кайгу сураськизы, пожазы егит ныллэсь мылкыдзэ.
Вуонояз эктонэ пияш ачиз Катяез ӧтиз.
«…туннэ бертоно. Кылем уйзэ чик изьытэк кыли. Со доры мынэме потыса, шузимыса пуки. Лопырскем бурдъёс вылам лобысал со доры, но… но со уг возьма. Я, ойдо чидало, мон кужмо. Берто анай-атае, эшъёсы доры, соос мынэсьтым мӧзмизы ни, луоз. Дыр йӧнатоз, дыр ваньзэ бурмытэ, шуо. Ӟучъёсты вазьгес, пе, келяны потӥськом. Одно ик мыноно луоз…(13 инвожо)»
Катя потӥз корпус азяз. Эшъёссэ ӧте вал ӟучъёс доры келяськыны мыныны, соглаш ӧз луэ. Оля мынысал, но вожатойёслэн сотэк но ужзы чыртыозь люкаськем. Озьы сылонъяз адӟиз, кызьы бускель корпусысь эшеныз ӵош потӥз ӟуч пияш. Катяос пала вамышъяло. «Кин доры? Малы? Кызьы озьы?» — чилектӥз нылашлэн йыраз.
Пиос ог дас вить метр кеме дугдӥзы, куинь минут пала кенешизы. Собере Катя доры вамыштӥз СО. Юн ӟыгырскизы. Малы? Мар та? Валантэм, секыт, ӝожмыт.
— До свиданья, — шуиз пияш.
— … — номыр ӧз быгаты вазьыны сюлэм.
Со кошкиз. Одӥг кыл но ӧз вера ни люкиськыкузы. Катя быдэс сюрессэ пеймыт очкизэ поныса бертоно луиз, тыршиз автобусын пукисьёслэсь ас мылкыдзэ мур сандыке ватыны, нош ик ӧз быгаты. Малы СО татчыозь номыр ӧз вера? Ӧз лыкты? «Ӟеч лу» шуыны сяна, номыр ӧз дӥсьты вераны? Катя уг вала.
Городэтӥ мыныкузы, кисьтыса жаль! зорыны ӧдъяз. Вить минут ӵоже сылӥзы — автобусэн дугдыса, малы ке шуоно вань машина ветлонэз ворсазы ву тросэн. Бам кузя гылӟо синкылиос, суто, пиялае шукко инлэн синвуосыз. Малы озьы? Малы?!
Катя туннэ улоназ тужгес но «шулдыр» вордӥськем нуналзэ ортчытэ.
Нош зоре. Зор улӟытэ пашмем будосъёсты, улонэз, быдэс ӵужектэм дуннеез. Со выльдэ, сӥятэ, сётэ выль кужым азьланезлы, чебер но шудо улонлы. Ву гылтоз вань кайгуэз, миськоз янгышъёсты, юрттоз улӟыны. Со ваньзэ гылтоз.
Ваньзэ гылтоз зор.
АДЯМИЛЫК ТУННЭ
ЭССЭ
Одӥгез тужгес но чебер, дуно кыл — со адямилык. Со одӥгез, мар понна туннэ кутскиськомы нюръяськыны, малы ке шуоно со — одӥгез, мае сьӧлыко адями дугдӥз валамысь, кутскиз ыштыны, вунэтыны. Ваньмыз та вуттэ мӧзмыт малпанэ: адямилыктэк адями ыштэ вылӥ статуссэ, ваське улӥ лёгетъёсы, учконо ке музъем вылысь улонлэсь пӧртэм азинскись формаоссэ. Озьыен, кинъёс асьмеос? Пудо-животъёс, кудъёсызлы кулэ мугор (физиологической) куронъёсъя гинэ улыны? Яке лултэм роботъёс, байлык но данлык утчаса, нырызлэсь кыдёке нокинэ адӟисьтэмесь? Яке… Мӧзмыт.
Адямилыко соиз, кин сюлмыныз быгатэ мукетыз сярысь кайгырыны, номыр но курытэк-возьматэк, секыт югдурысь поттыны, ӟеч малпанъёсын котькудӥзлы вазиськыны.
Адями, одӥгназ ваньмызлэсь палэнын улыса, зэмос визьмо но йӧно луымтэ на, соин ик со дауръёс ӵоже дышетскем ӵошен улыны. Ог-огдэ валан юрттэ пушдуннеез муромытыны, капчиен улон шоры учкыны. Туннэ нуналэз чакласа, йырам малпан кылдэ: адями азинскон сюресаз оптимум точкаяз вуэм (тужгес но вылӥ быгатонлыко), сое ортчем но, али улэ но улэ лэзиське, тыриле улӟыны, аслыз шуд утча, нокинэ вӧзысьтыз лыдэ басьтытэк, «улон корказэ» укноостэм-ӧстэм ӝутэ. Корказэ пуктоз, сьӧраз пыртоз ваньзэ кулэзэ: сиён, шуныт, мешок коньдон (медам ул куанер!), яратоно адямизэ (медам лу мӧзмыт!), пытсаськоз но одӥгназ улоз, куалялюльы сямен. Ульчаетӥ ортчыку, та туж умой шӧдӥське: ум быгатӥське пересьёслы сюресэз потыны но усем муртлы ӝутӥськыны юрттыны, трамвайын инты сётыны, юасезлы — валэктон сётыны. Малы одно мон? Мукетъёсыз уг быгато-а, мар-а? Тросэз асьмеос пӧлысь сыӵе кылъёсыз малпаса улэ . Адямиос котыр трос, нош мон мӧзмисько адямилыклэсь.
Малпасько, котькудӥзлэн лулпушказ вань сыӵе югытлыкез, но со туала катъёсъя улыса, умме усемын. Быльырало ке синвуос, шуом, футболэн шудӥсь эшъёссэ чаклась инвалид коляскаын пукись пияшез адӟыса, озьыен, улэп на адямилык, нош кыле на сое сайкатыны, яркыт карыны. Котькуд ӟеч кыл валтоз сьӧраз дассэ, дас одӥгез дунне вылысь ӧжыт ке но шудогес луозы, со ӟечлык палалоз сюэзлы. Яке капчигес-а асьмелы, вотэсэн бинялскыса, синмес кыньыны но, аслыкъяськыса, измем дуннее пегӟыны?
Чебер уйвӧт, вунэтонтэм,
узвесь шапыкъёсын пиштэ тодам,
бамме коттэ сылал вуэн,
яркытэныз мыным кулэ, но луысал.
Капчи, адӟысалы ке уйвӧтам со висёнэз,
Яратонэ, малы тон вал
Но тон ноку уд ву ини малы?
Шудо мон луысал тонтэк трослы.
сьӧд инбамын ӝуало ’
горд бадӟым шундыос,
лулыд пеймытэ ке выйиз,
оскы аслыд но инлы:
котькуд кизили югдытоз сюрестэ,
со котькудиз ук шунды,
адӟыны югытсэ — кулэ ке тыныд —
аслад ужед.
НИМТЭМЧУРЪЕС
Мон бубыли кадь — улонэ вакчи,
Сӥзьыл куашкась куаръёс кадь,
ӝог шуяй,
ӧй вутты улыса, сюе кӧчи,
аслам вылам нумыр но
му куяй.
Ачим ӧй бырйы — улонэ косӥз,
Нош шонергес ке,
Музъеммы пасяз
Оло пуштӥз, оло шунды кысӥз.
Шальтрай, ӧй тоды, мар вал отӥяз.
Зэмзэ ке верано, ай мон улэп,
Азьланетэк но мартэк адями,
Пыкъяськисько майя гожтэм вылэ:
Кык ар кылем музъеммылы.
Соин чалми.
Зарезь эктэ. Я, буйгатскы,
Посейдонлэн нылыз,
Синвуостэ шунды ӝоген басьтоз аслыз.
Тулкым вирсэръёсад шудэ, пазя лулдэ,
Мон шӧдӥсько тонэ, я чаль. Я вай кидэ.
Уд сёты? Ойдо, ӵок. Сюлэм пӧзе…
Куасалляло тулкымъёсыд ёзвиёсме.
Чагыр синмам ортчем дырез витён.
Оло ӧвӧл ни мон? Ӧвӧл…
Пушкам — тон.
Кукей — со шунды. Со музъем.
Со солэн шорыз.
Со улон но кулон.
Со адямилэн лулыз.
Со адями
Ӧвӧлтэм яке вань луыкуз.
Соин, дыр, питра му улэ я инэ ваньмыз.
Лул, эн кул, эн быры
Сукыресь улонъёсад.
Сыл, укыл эн учкы
Бездӥсесь малпанъёсад.
Тон, кулон, эн лёгаськы
Пыдберъёсаз луллэн
Али, куке солэн кияз
Киыз улонэзлэн.
Лыктӥ туннэ шулдыр яркыт балэ,
Капка азьын сэзь гырдалля валэ.
Сюрес кузя будо ӵуж сяськаос.
Мон шӧдӥсько — эше татын луоз.
Озьы ик вань, тӥни, адӟиз монэ,
Нош ик гыбдаз но ӝуатскиз яратонэ.
Только чаляк сылмиз йырам вордскем суред —
Соос ведь кулэмын. Нош мон улэп…
Дышетӥзы монэ: умоезлы оскон
Кыдатыны кулэ пушкад, нош мон…
Мынам отын пуке лусьтро дракон,
Сузя лулме, чырмыт черекъямон.
Шуэ: «Эн оскы, алдало тонэ,
Вӧзад тушмон — со ӵуказе, толон, туннэ».
Тушмон пушкам, сое мон шӧдӥсько.
Солы уг оскиськы, но…
…оскисько.
ЮСЬЯРАТОН
Легенда
Трос дауръёс ӵоже сылэ Чупчи шур дурысь нюлэс, вашкала дыръёсы со трослы пеймытгес но сьӧдгес вал. Удмурт калык улӥз пичи гуртъёсаз, кутылӥз чылкыт Чупчиысь чорыг, нюлэскын пӧйшураз коньылы-ӟичылы, отын ик мушказ. Соку одӥг удмурт пересьлэн, пурысьтам Вӧсясьлэн, будӥз одӥг гинэ нылыз Кибья. Будӥз со туж ужась, мусо но веськрес. Дас укмысаз мыныса, со шудыны но ӧз пота: черсӥське, вуриське, керттӥське, бакчаяз емышъёссэ утялтэ. Нылаш пичи дыръя, анаез кулэмен, солы атаеныз валче юртсэс ӝутоно луиз. Котькудӥз, кин пыре коркаязы, паймыттэк уг кошкы — сокем чебер но ӝикыт улӥзы та семьяын.
Кибьяез ӝытъёсы шудонын егитъёс возьмаллязы, ваньмыз ик пото, со гинэ дораз пуке. Нылмурт атаеныз вераськыны малпаз но куриськиз ӝыт шулдыръяськыны потыны. Вӧсясь шуиз:
— Мусо Кибьяе, нылы, кылзы монэ али сак. Тыныд табере дас тямыс, вуиз карысьтымы лобӟыны вакыт. Мон тонэ туж умой валасько, шундые, но вала тон но монэ: агай-выныд ӧвӧл бере, мыным юрттӥсь луоз тынад кузпалэд, со ик мед азьланьтоз мынэсьтым Быдӟым югыт ужме. Нош тон егитъёсын пота, ӧжыт пеймытаз ке, одно берт — кузпалъяськон сярысь мон малпасько на.
— Атай, тон котьку мон понналуод шонер. Тау бадӟым валамедлы!
Озьы Кибья ас арлыдо эшъёс шедьтӥз, соосын ветлыны кутскиз эмезяны, тылскем дурын пукылыны. Нош пиос пӧлысь нокинэн матысь ӧз эшъяськы — тодаз возиз атаезлэсь кылъёссэ.
Одӥг ӝытэ бусыысь шудэмысь бертэ вал, шур дурысен вазись луиз:
— Ӟечбур, мусое, бертӥськод-а ни?
Пужей вылэм со, гуртысьтызы одӥгез тужгес но шаплыез но шӧртчиез, ныллэсь ог дас вить ареслы бадӟым пиосмурт.
— Умоесь, — вазиз нылаш.
— Монэ бадӟым кариськод-а, мар-а? Вазь на бертыны, чаль пуком, вераськом. Мон тонэм уйен-нуналэн ӵош пукысал.
— Тӥ мар-о, шузимиды, луоз? Мар вераськоды? Мыным бертоно ни, ӟеч луэ.
Пужей, Кибьяез кутыса, ӟыгыртӥз:
— Кибья, дуное мынам, бызь вал мынын! Мон тонэ зарниен пылато, буртчинэн шобырто, ки вылам гинэ нулло! Асьмелэн ведь ваньмыз азьланяз.
Кибья черетскиз но, соиз ымзэ пытсаз, нылашез кужмысь кыскиз сюрес вылысь палэнэ. Соку вазись луиз, Кибья тодмаз шудонэ потась Марданлэсь куаразэ.
— Кин татын? — юаз куара.
Кибья тушмонэзлэсь кизэ куртчиз, зол черетскиз. Соку ик Мардан вуиз Пужей доры, сэрпалтӥз сое, лек нюръяськон пурӟиз. Кибья, кышкаменыз куалекъяса, мырдэм куриз Марданэз сэзъям муртсэ улэпкын лэзьыны. Мардан со уйе Кибьяез дорозяз келяз. Котькуд нунал соос пумиськылӥзы, яратэмзэс вератэк. Кибья ӧз тоды, Мардан но, солэн атаез но Инмарлы уг оско шуыса. Нош Вӧсясь нылызлы тупамон карт но шедьтэм: Пужей, пе, ужез валась, Инмарлы вӧсяськись, улонэз адӟем адями, ӟеч кузпал луоз.
Тае кылыса, Кибья атаезлы вераз, кыӵе зол со яратэ Марданэз, сотэк улэмез уз луы ни шуиз. Озьы со эшеныз валчеяськиз.
Вӧсясьлэн пумтэм вожез потӥз: кызьы солэн одӥг гинэ нылыз сыӵе сьӧлыко адямиен улыны малпа! Озьы ке, мед улозы, кызьы быгато, нош гурт калык азе медам поталэ — Инмарез, Кылдысинэз но Куазез вунэтэмъёс асьсэды удмурт медам ни шуэ.
Пужей, та иворез кылыса, вожаменыз визьтэммиз. Трос малпаськиз со, кызьы Мардан киысь чебераез лушкано. Тыр толэзё уйе Пужей лушкем лыктӥз шур дурын вераськыса пукись егит пар доры, шӧдтэк шорысь омырскыса, Марданлэн тыбыраз пуртэн бышкалтӥз. Тае адӟыса, шузимем Кибья кеськиз вылӥе:
— Инмаре, жаля, юртты, эн потты вождэ милемлы! Эн люкы милемыз ноку но!
Со басьтӥз виресь пуртэз но соин ассэ бышкалтӥз. Пужей кыкназэс ик куштӥз Чупчи вуэ, тыр толэзьлэн чилясь-ворекъясь вужераз. Огшап улыса, вуысь лобӟыса ӝутскизы тӧдь-тӧдь юсьёс — со вал калыкен валамтэ кык лулъёс.
Котькуд тулыс Чупчи вылысь адӟыны луэ парен уясь юсь парез — соос ноку уг люкисько, котьку вуо но кошко ӵошен.
Михаил Якимов (Ува ёрос, Родники гурт)
Милям дышетисьмы
Вань милям дышетӥсьмы,
Булайын улэ сомы.
Дышетэ со милемыз,
Туж чебер солэн тусыз.
Оломалы но дышетэ,
Выленыз тодматылэ.
Туж визьмо но сюлмаськись,
Анай кадь ик яратӥсь.
Чебер, йӧно дӥсяське,
Чакласа возе ассэ.
Сюлэмыз солэн либыт,
Куараез буйгатӥсь, лачмыт.
Урокын ваньзэ валэктэ,
Милемыз со паймытэ.
Вань верамзэ кылзӥськом,
Визьнодо луыны тыршиськом,
Тау Маргарита Васильевна,
Ӟеч тазалык тыныд, дышетӥсе.
Котьку лу чырткем, йӧно,
Небыт, чылкыт сюлэмо.
Лада пуные
Мон пуны возисько,
Лада сое шуисько.
Туж зол эше бызьылэ,
Котьку ик мыным юрттэ.
Быжыз пуштрес, котырес,
Пельёсыз нош вакчиесь.
Синъёсыз сьӧд чиляло,
Мусоен шорам учко.
Муртлэсь коркаме уте,
Асме но чакласа возе.
Ваньмон дыръям шудӥсько,
Ладаме яратӥсько.
Усто губиямы
Вож тэле сӥзьыл мынӥ,
Утчаны лӥялгуби.
Лӥялъёсты котыръясько,
Губиосты чакласько.
Ӧй шедьты лӥялгуби,
Юнме мон татчы лыктӥ.
Мукет губиосты утчасько,
Корзинаям каллен тырисько.
Быдэс тэлез котыртӥ,
Корзинаме тырмытӥ.
Шумпотса вырӟи гуртэ,
Корзинае нош секыт кыске.
Пумитам сюризы эшъёсы,
Соослэн бушесь корзинаоссы.
Паймыса шорам учко:
— Кытысь шедьтӥд? — юало.
Мон соослы вазисько:
— Тэльын сакгес луоно.
Умой уд утчаське тӥ соосты,
Уд тодӥське губи интыосты.
Чакласа ветлыны кулэ,
Утчась муртлы, пе, шуд усе.
Эшъёсы валатскизы,
Тэль пала вамыштӥзы.
Чакласькыса губи утчало,
Ведроосазы кален тыро.
Трос губи шедьтӥллям,
Шумпотыса гуртазы бертӥллям.
Мукет нуналаз шуисько:
— Тини озьы мон утчасько.
Тодэ губи интыосты,
Чакласа возе соосты.
Тямысэтӥ южтолэзь
Тямысэтӥ южтолэзь вуиз,
Сузэре туж шумпотӥз.
Та нылъёслэн нуналзы,
Ваньзы возьмало кузьымъёсты.
Вань нылъёс пальпото,
Анайёс но серекто.
Мемиелы кышет кузьмасько,
Нылъёслы сяськаос сётӥсько.
Анае сярысь сюлмаськисько,
Котьку солы юрттӥсько.
Ваньзэ умойзэ сӥзисько,
Мон сое яратӥсько.
Вордӥськем гуртэ
Мынам вордӥськем пичи гуртэ,
Пичи ке но, югыт пиштэ.
Удмуртиын гуртэ кылдэм,
Дунне вылэ со каръяськем.
Трос ошмесъёс отын бызё,
Гуртме Родники нимало.
Пӧртэм калыкъёс отын уло,
Ог-огенызы эшъясько.
Омыр ву кадь ик чылкыт,
Бусыосын котыр яркыт.
Пальпотӥсь шунды пиштэ,
Быдэс гуртмес югдытэ.
Дуно мусо шаере,
Яратӥсько мон тонэ.
Котьку сюлэмам возё,
Син азям тустэ пукто.
Быдзым кушъя
Тӧла, тӧла, быдӟым тӧл,
Улля, улля пилемъёсты.
Мед луоз дунне вӧл-вӧл,
Мед пиштоз святой инты.
Святой — со ӟуч кылын,
Удмурт кылын со кадыр.
Мед югдоз кадыр инты,
Умоез луоз кӧттыр.
Эй, кушъя, быдӟым кушъя,
Интызэ со весь вошъя.
Адӟиськиз, тӥни лыктэ,
Учкелэ, мар ке гожтэ:
— Мон дунне вылын кузё,
Мукетъёсыз мыным мунё.
Вылӥысен мон ваньзэ адӟисько,
Дуннеез весь чакласько.
Тӥни отын шаянто,
Татысен мон адӟисько.
Кушъямы отчы лобиз,
Шаянтӥсез дугдытӥз.
Сак синмо Быдӟым кушъя,
Вылӥысен дуннеез чакла.
Калык данъя та бурдоез,
Инмын лобась кузёез
Узыр Миша
Мынам нимы Миша,
Котькинлы укша.
Улӥсько инӵабъясьын,
Нош ужасько котранын.
Тодӥсько трос кылъёсты:
Англи, араб, китай,
Италь, ӟуч но бокай.
Яратӥсько мон соосты.
Дуно телефонъёсын вераськисько,
Солы мон шумпотӥсько.
Паллян кисыям айфон,
Нош мукетаз смартфон.
Пӧртэм машинаосын ворттылӥсько:
«Хамер», «Тойота», «Феррари»,
«Ламборджини» яратӥсько,
Туж зол лобасько.
Тини сыӵе мон пияш,
Синмаськы мыным, нылаш.
Бордысьтым лакоз* зын потэ,
Мон доры бызьса лыктэ.
*Лакоз (Lacoste фр. кыл бордысь), Лакост — французская компания, основанная в 1933 году, производит одежду, обувь, парфюмерию, оптические и солнечные очки, теннисные ботинки, часы и различные кожаные изделия.
Вуоноез гожтэт
Мон гинэ донгыс-удмурт,
Эгыр сямен тыласько.
Мон гинэ туннэ огнам,
Удмурт кылме валасько,
Ас поннам вераськисько.
Удмурт кыл — тон эксэе,
Кинэн тон кытчы кошкид,
Малы монэ шур дуре,
Викышъятыса кельтӥд.
Тазьы монэ йыромытӥд,
Кинэ озьы тон яратӥд,
Кинэ озьы шудо карид.
Жалясько, туж бер вордски,
Бер гожъяськыны кутски,
Кылбуръёс пӧрмытылӥ.
Адӟысал ке тонэ мон,
Луысал тонэн тушмон.
Кутысал киям сюло,
Эх, тодысалыд уг тон,
Кызьы монэ шачыръяло.
Эмъяськи
Ӵукна ӵук султӥ
Азбаре потӥ.
Анаелы шуи:
— Висьыны кутски.
Анае монэ валаз,
Висьыны кутски кожаз.
— Кытӥыд-о висе, — юа,
Йырме каллен веша.
— Татӥтӥм, анай, висе,
Туж зол вӧськаре,
Татӥтӥм но бышкалтӥз,
Шоканы секыт луиз.
— Бусен доры мыном,
Тонэ ӝоген эмъялом.
Пелляськись вӧзы султӥ,
Кытӥ висе возьматӥ.
Пӧртэм куараос вералля,
Монэ озьы эмъя.
Нырысь вазе ву-у-у-у!
Собере ӟазег сямен с-с-с-с!
Мон куалекъяны кутски,
Анай борды ӟыгырски.
Пелляськись дораз кыскиз,
Хрум-м, храм-м пельтӥз.
Ӵуказеяз ӵукна султӥ,
Азбаре потӥ.
Анаелэсь куаразэ кылӥ,
Номыр но уг висьы ни шуи.
Сизьыл вуиз
Шаере сӥзьыл вуиз,
Котырак зарни пазьгиз.
Калык солы шумпотэ,
Солы бадӟым тау каре.
Куддыръя зоръёс кисьто,
Чебер нуналъёс соосты вошто.
Бакча сиён но октӥськом,
Губи но бичаса вуттӥськом.
Нырысетӥ куарусёнэ дышетскиськом,
Эшъёсмес но адӟиськом.
Пиналъёс шудыны потало,
Анайёссылы но юртто.
Турын но турнаськом,
Картофка но октӥськом.
Писпуос толлы дасясько,
Куаръёссэс сӥзьыл кушто.
Тылобурдоос шуныт палъёсы лобӟо,
Мукетъёсыз толйыны вуо.
Ваньзы ик изьыны выдо,
Пӧйшуръёс но каразы пыро.
Турын-куар изьыны выдэ,
Нымы-кибы умме усе
Калык сӥзьылэз келя,
Тӧл но сое улля.
Тол
Тол вуиз, толалтэ,
Калык табере куректэ.
Нош праздникъёслы шумпотэ,
Соосты шулдыр ортчытэ.
Тӧдь-тӧдь лымы усе,
Олокытчы но пуксе.
Быдэс дунне югыт луэ,
Ваньзэ лымы шобыртэ.
Пиналъёс куасэн нисклало,
Конькиен но ширтыло.
Лымы мунё лэсьтыло,
Лымыын погыллясько.
Укноосты тол кынтӥз,
Шуръёсты йӧ улэ ватӥз.
Пӧйшуръёс мамыктӥ бызьыло,
Югытлы соос лӧпто.
Инме толэзь потӥз,
Куазь кезьыт кариськиз.
Пиналъёс укно дурын пуко,
Мӧзмыса ураме учко.
Писпуос нош чильтэро,
Йӧнъясько, сыло, пишто.
Музъем лымыен шобырске,
Тӧдь ковёр улын кӧлэ.
Куасъёс
Выль куасъёс мон басьтӥ,
Нискыланы гурезь вылэ туби.
Туж зол кошкисько,
Тӧлэн ӵошатскисько.
Вожектӥсь тулыс вуэ,
Мамыкез каллен шунтэ.
Пиналъёс куректо,
Гуртазы соос пуко.
Жаль ке но люкиськыны,
Куасъёсын туннэ.
Интыяй шутэтскыны,
Нош ик чуланэ.
Бызьылӥзы, нискылазы,
Табере соос.
Выль толозь мед адӟозы,
Лымыё вӧтъёс.
Юрттӥськись
Мемиезлы Петыр юрттэ,
Убо вылэ кушман мерттэ.
Бадӟымесь мед будозы,
Гужем ӵоже пушъёзы.
Пальпотӥсь шунды пиштэ,
Петыр бызьылыса ву кисьта.
Ӟигарыз ӝоген быре,
Убоосыз мар ке мында.
Уриськыны но кулэ,
Татын но мемиезлы юрттэ.
Ӵушкушманэз удалтӥз,
Куинь мешок октӥз.
Тыршись будэ Петимы,
Котьку дась юрттӥськыны.
Вань ужез сюлмысь лэсьтэ,
Семьязэ со шумпоттэ.
Ӵушъял
Кыштыр куаръёс усё,
Тӧлэн соос лэйкало.
Нош кызъёс озьы ик сыло,
Вож дӥсьсэс уг вошъяло.
Тэль пала вамыштӥ,
Ӵушъялэз отысь адӟи.
Караз мынэ бызьыса,
Мынэсьтым, оло, кышка.
Куаръёс пӧлы ватскыса,
Мон шоры учке паймыса.
Собере ӵушъял кошкиз,
Ужъёссэ тодаз вайиз.
Кӧня ке со утчаськиз,
Лӥял сьӧрысь губи шедьтӥз,
Веньёс вылаз бышкалтӥз.
Бызьыса караз пыриз.
Кезьыт тол вуоз,
Пӧйшуръёслы кезьыт луоз,
Ӵушъяллы кышкыт ӧвӧл,
Толлы дасяськиз со зол.
Вордӥсько кизилиос
Уйин ураме потӥ,
Вылӥе инме учки.
Лобе инметӥ,
Яркыт кизили.
Дорам эшъёсы вуизы,
Маке ӟечсэ малпазы.
Соос шумпото,
Кизилиослы оско.
Шулдыр ӵукна вуиз,
Эше дорам вуиз.
Малпанэ, пе, быдэсмиз,
Азбарам машина кылдӥз.
Пиштэ вадьсамы,
Тини учке али.
Музъем выламы,
Вордӥськем кизили.
Шумпоттӥсь тулыс
Тулыс вуиз, тулыс вуиз,
Котырак инкуазь улӟиз.
Ваньмыз будэ, чеберске,
Калык ужаны потэ.
Пиналъёс вуэн шудо,
Пичи пыжъёс лэзьгало,
Отын ик коласько.
Мемиоссылэсь уг кылзӥсько.
Пӧйшуръёс карысьтызы пото,
Тулыслы соос пальпото.
Нымы-кибыос но сайкало,
Чорыгъёс уяны кутско.
Шунды кемалы пота.
Котыр лымы шуна,
Тудвуос зол кошко,
Сьӧразы жуг-жаг нуо.
Сьӧд шырчикъёс вуо,
Горд кӧтулъёс кошко.
Шуръёс бызьыны кутско,
Чорыгасьёсты доразы ӧтё.
Ваньмыз будэ, чеберске,
Куар но писпуын потэ.
Бакча сиён калык мерттэ,
Тулыс ваньмызлы уж тырме.
Гужем вуиз
Гужем вуиз,
Гужем вуиз.
Дунне сяськаен шобырскиз,
Вань калык шумпотӥз.
Тылобурдоос но лобало,
Асьсэлы сиён утчало.
Нымы-кибы шедьто,
Йыды но кокчало.
Сяськаос каллен усьтӥсько,
Дуннеез чебермыто.
Сяська вылэ муш пуксе,
Нош модоссэ пудо сие.
Яркыт шунды пиштэ,
Дуннеез шунтэ.
Бӧрдӥсь зоръёс вуизы,
Пиштӥсьмес уллязы.
Зор дугдӥз,
Шунды потӥз.
Музъемез кӧсатӥз,
Сяськаосты шупатӥз.
Гужем — яратоно дырмы,
Котьку мед улоз дорамы.
Асьмемыз со утялтэ,
Узырлыксэ сётэ.
Улон — со кузь сюрес
Улон — со кузь сюрес,
Азяз солэн трос шуг-секытъёсыз
Пӧртэмесь малпанъёсыз.
Йырзэ эн сура солэсь.
Шумпот но яраты улондэ,
Яратытэк ӧвӧл улон.
Эн тышкаськы яратондэ,
Матысь эш солы тон.
Быгаты жаляны,
Быгаты валаны,
Быгаты куректыны,
Быгаты яратыны.
Солэн пичи сюлэмыз,
Ноку уз вунэты тонэ,
Каллен со йыгалоз гадяз,
Со возьматоз яратондэ.
Тани сюрестӥ вамышъяса,
Мынкоды китӥды возиськыса.
Урод мылкыд но кайгу,
Уз лыктэ тӥ доры ноку.
Льӧмпулы сӥзён
Льӧмпу — небыт, чылкыт будос,
Мыным тон туж мусо.
Льӧмпу монэ шумпоттытэ,
Кайгуосме вунэтытэ.
Льӧмпу куд-ог дыре мыным,
Луэ сыӵе кышкыт висён.
Мыным тодам со вайытэ,
Кызьы пӧяз монэ бусён.
Льӧмпу, тон коралтон люкет,
Мон куштысал тонэ нюке.
Мед тон отын куасьмод, сисьмод,
Соку монэ тон валалод.
Льӧмпу, мон котьку вожасько тонэ,
Угось котьку но туганэ,
Весь зынъяса ортче тонэ.
Кутӥ киям тӥрме,
Коралтӥ одӥг вайзэ.
Льӧмпу, тонэ мон ялан жалясько,
Тӥрме берен сэрпалтӥсько.
Сюлэмы мынам бӧрдэ,
Сюлэмы тонэ шӧдэ.
Кыӵе тыныд вӧськари,
Ӝог эмъяло тонэ али.
Чебер ук сяськаед тынад,
Зынъяса мылкыд шуна.
Удмурт кыл
Удмурт кылтэк мыным кышкыт,
Улонэ луэ бездыт,
Азьланед тынад бусыын,
Нош вужзэ нуиз ни ӵын.
Удмурт кыл, тон вожме поттӥськод,
Малы бен ӟуч кыллы сётӥськиськод,
Пень луыса тон тӧлъя лобӟиськод.
Удмурт кыл, кытчы ышиз вашкала визьмыд,
Кытын тынад ваньзэ бурмытӥсь кужмыд.
Кытчы тон йыромид,
Мылы тон огнаме кельтӥд.
Мӧзмисько мон тынэсьтыд,
Тыр толэзь кадь мӧзмисько,
Мур но мур лулӟылӥсько.
Сюлэмам ӝуа пӧсь тыл,
Быремысьтыд удмурт кыл.
Муртъёслы вожъяськисько,
Асьсэ кылын верасько.
Удмурт кылэз мон данъяло,
Азьпала поттыны тыршо.
Вордӥськем палъёсы
Вордӥськем гуртме яратӥсько,
Дорелэсь туж мӧзмисько.
Родники гуртын будӥ,
Вань ӟечсэ отысь адӟи.
Лудъёстӥ, нюлэсъёстӥ поръяй,
Ошмес вуэз но веръяй.
Утялтыса сое возисько,
Ошмеслы шумпотӥсько.
Тылобурдоослэсь гурзэс кылзӥ,
Эшъёсме туж келышытӥ.
Бубылиен но ӵошатски,
Италмас сяська адӟи.
Яратӥсько вордӥськем гуртме,
Вунонтэм, чебер дорме.
Вож тэльёс но шурмы,
Котьмалэсь дуно мыным.
Чорыгась Коли
Ми шурез яратӥськом,
Пыласькиськом, чорыг уйылӥськом.
Коли чаляк поттылэ,
Пакетэз ини тырме.
Чорыгъёсты со сюдэ,
Пӧртэмесь кеньыръёс пазьге:
— Чале, чале, чорыгъёс,
Лыктэлэ дорам, уясьёс.
Нош Коли кыштыр потта,
Карп, карась, плотва, чипей, пая.
Коӵышез каллен лушка,
Колиез кыштыр пӧя.
Шурез пияш яратэ,
Чорыгъёсызлы туж шумпотэ.
Котьку, пе, чорыгало,
Семъяме озьы сюдо.
Куректӥсь Вова
Пичи Вова каллен пуксиз,
Ӝожмыт лулӟылны кутскиз.
Кӧтсэ солэсь ӝож кариллям,
Эшъёсыз бӧрӟытӥллям.
Вава доры нылаш вуиз:
— Мар тонэн пияш луиз?
Эн бӧрд, мон тыныд юртто,
Секыт учырысь потто.
Киоссэ нылаш кутӥз,
Мусо лӥятыны кутскиз:
— Дугды, дугды бӧрдэмысь,
Ойдо, кошкомы татысь.
Кин-о тонэ вӧськариз,
Лякыт пиез бӧрӟытӥз.
Али ик мон тыныд юртто,
Укылтэмез ӝоген шедьто.
Вовамы бӧрдэмысь дугдӥз,
Ымдураз серектон потӥз.
— Тау тыныд, — пияш шуиз,
Бызьыса гуртаз бертӥз.
Югдытэм нунад
Каллен ӝутске зарни шунды,
Сьӧраз ӧте тыршись калыкъёсты.
Кыштыр ужъёс кутско,
Нунал куспын быдэсмо.
Шунды сиос котыр пазьгиськемын,
Быдэс дуннеез югдытэмын.
Соос югдыто азьпал сюресмес,
Шулдыр каро улонмес.
Шунды кален ваське,
Ӵыжетскемез солэн потэ.
Ваньзы изьыны выдо,
Шундылы тау каро.
Миша (ачим сярысь)
Мынам нимы Миша,
Котькинлы укша.
Улӥсько Родники гуртын,
Туж умой мыным отын.
Оломар но карисько,
Котькытчы но вуттӥсько.
Йырам чуръёс кылдыло,
Озьы кылбуръёс пӧрмыло.
Школаын умой дышетскисько,
Волейболэн но шудӥсько.
Анаелы юрттӥсько,
Эшъёсме паймытъясько.
Конкурсъёсы пыриськисько,
Вормисе потылӥсько.
Экспедициосы ветлӥсько,
Шаермес эскерисько.
Визьмо ужъёс гожъясько.
Докладъёс но дасясько.
Трос книгаос лыдӟисько,
Узыргес мон луисько.
Дэри гуртэ — куное
Ӵукна-ӵук султӥ,
Час шоры ӝоген учки.
Дэри гуртэ мыныны кулэ,
Республиканской конкурсэ.
Тани автобусэ пуксим,
Булай палъёсы ми мынӥм.
Школа доры вуиськом,
Анна Петровнаез пумитаськом.
Булайысь каллен вырӟим,
Нылгала ӝоген вуим.
Отысен мукет автобусэ пуксим,
Дэри гурт пала ширтӥм.
Шумпотыса мынӥськом,
Пумен школа доразы вуиськом.
Милемыз шулдыр пумитазы,
Пӧртэм кабинетъёсы ӧтизы.
Устоен асьмемыз возьматӥм,
Куинетӥ инты отын басьтӥм.
Бертӥм шумпотыса,
Автобусын но кырӟаса.
Тулыс вуэ
Жингырес тулыс вуэ,
Синъёсыз ик мальдытэ.
Пиналъёс но шумпото,
Шудыны бызьса пото.
Котырак музъем улӟе,
Инмын шунды пальпотэ.
Лымы шунаса быре,
Вож турын каллен мычке.
Урамтӥ тудву ваське,
Жильыртӥсь гурзэ кисьтэ.
Сяськаос лымы улысь пото,
Дуннеез чебермыто.
Шунаса лымы быриз,
Дунне сяськаен шобырскиз.
Шуръёс йӧ улысь потӥзы,
Паськытаса бызьыны кутскизы.
Жильыртэ, жингетэ но кырӟа,
Тулыс выль кен кадь пальыша.
Мылкыд бурдъяське но улӟе,
Тюрагай гурен инбаме лобӟе.
Оля Арзамасова (Пичи Пурга ёрос, Кабыста гурт)
Шуд
Мон шудо адями:
Анае вань мынам,
Атае но вӧзам,
Эшъёсы котырам,
Яратон сюлэмам.
Мон шудо адями:
Улӥсько дуннеын,
Туж шулдыр шаерын,
Удмурт Элькунын Пурга ёросын.
* * *
Мон яратко! Соин ик мынясько.
Мон яратко! Соин шумпотӥсько.
Мон яратко! Соин ик улӥсько.
Вань улонме тынадэныз мон герӟасько!
Вань сюлэмме тыныд мон сётӥсько!
Яратонэз кыкнамылы мон люкисько!
Синвуос
Синвуос быльырало —
Тынэсьтыд соос мӧзмо.
Нош сюлэм зол йыгаське
Со тонэ озьы вите!
* * *
Бен усьты ни тон сюлэмдэ яратонлы.
Кема ӵоже со йыгаське ни тон доры.
Кыӵе муген уд лэзиськы сое?
Валэкты мугзэ!
* * *
«Аракы бордаз кыске,
Тамаклы уксё кулэ,
Доза весь бон гочатэ…»
Малпаське пияш.
Вина шур пӧлы вые,
Тамак зын но гочатэ,
Ломка но тани кутске…
Курадӟе пияш.
Кытысь, мае лушкано?
Кинлэсь уксё талано?
Пияшез та юанъёс
Уй-нунал визьтэммыто.
Тӥ пияш шоры эн учке,
Тӥ солы эн вожъяське!
Винаез, тамакез но наркотикез
Дауръёслы вунэтэ!!!
* * *
Ортче нунал, ортче арня,
Нош нылашлэн сюлмыз возьма.
Синлысъёссэ лэзе уллань
Ваньзэ, ваньзэ лэсьтэ мыдлань.
Сьӧраз ветлэ вужер сямен
Вамыш бӧрсьы эскериське.
— Пайдэз уз луы, гыдыке,
Нош со: «Уг сёты нокинлы но мон сое!»
Тулыс
Пуке коӵыш укно дурын
Мисьтӥськыса.
Со кутылэ ни кутъёсты
Шузимыса.
Тӥни озьы вуиз тулыс.
Пальышаса.
Улон
Улон уг сылы интыяз
Дыртэ, берга со ас ӧраз.
Шумпотонэн, куректонэн
Ортче вань улонэз адямилэн…
Гуртэлы
Трос аръёс ини ӵоже
Кабыста милям пушъе.
Со дано гурт калыкен,
Колхозэн, «зарни киен».
Мар шедьтод милям гуртысь?
Мае кельшытод татысь?
Шепаськись ю-бусыез,
Жильыртӥсь юзмыт шурез.
Тулыс куазь гуртам вуэ ке,
Шобырске со сяськаен.
Гужем куазь гуртам лыктэ ке,
Пачылме пӧртэм ужен.
Анай
Вазь ӵукна ик султыса
Гур дорад тон бергаськод.
Пыжиськем трос пӧраса
Семьядэ утялтӥськод.
Трос тынад малпаськонэд,
Трос пӧртэм сюлмаськонэд.
Семьяед бордын шудэд
Нылпиё ке улонэд.
Яратӥсько
Малпасько: яратӥсько!
Бен соин ик мӧзмисько.
Возьмасько — ку ӟыгыртод?
Тон вуод — бордад ӝиптод…
Мария Орлова (Алнаш)
Кыӵе зол мон янгышай,
Куке тонэ пумитай.
Со куспын ик яратӥ,
Муг шедьтӥ но тодматски.
Кытӥыд кыскиз бордад?
Маиныд меда ярад?
Оло задор синъёсыд?
Оло нош выросъёсыд?
Коть чебер туж вылтусыд,
Воксё сьӧд вылэм сюлмыд.
Тон монэ алдад, куштӥд,
Сюлэмме туж вӧськарид.
Тон кожад вал мон кайгыро?
Оло нош йырме быдто?
* * *
Кытын тон? Мон тонэ ӧтисько.
Кытын тон? Мон тонэ утчасько.
Кытын тон? Котырак лымы.
Кытын тон? Туж кезьыт мыным.
Кытын тон? Сюлмын укыр пӧсь.
Кытын тон? Алдамедлэсь — вӧсь.
Кытын тон? Мон тонтэк бырисько.
Кытын тон? Мон тонэ яратӥсько.
* * *
Мынам валам потэ малы
Котьку монэ ке адӟиськод
Задор шунды кадь луиськод?
Оло монэ тон яратскод?
Нош малы бен поръякумы
Мыным тон вераськод
Кыӵе аслад нылашедлэсь
Куректӥськод но мӧзмиськод.
Бен малы тон уд валаськы
Кызьы со вань вераменыд
Нылаш сюлмез тон пилиськод,
Кӧтӝоже вуттылӥськод.
Монэ синъёсыныд малы
Ческыт лыэз кадь йырйиськод?
Эшшо уг валаськы малы
Писэйпиез кадь лӥятскод?
Мон турттыса тонэ валан
Уен-налэн малпаськисько,
Оло нош воксё тон монэ
Лултэм кизили кожаськод?
Кызьпуос
(басня)
Кыдёкын оло матын,
Туж паськыт возьвыл шорын,
Будӥллям вить кызьпуос,
Чебересь вылӥллям соос.
Одӥгез соос пӧлысь
Вылэм туж вылтӥяськись.
Со вал самой чеберез,
Веськресэз но ӝужытэз.
Котькуд ортчись адями,
Одно сое ушъя ни.
Соин кузьпу вылтӥяськиз,
Эшъёсызлэсь но палэнскиз.
Одӥг пол огшор налэ
Тӧласькын туж зол кутскиз,
Кытысь ке лек тӧл лыктӥз,
Нош ньылезлэсь палэнтскиз.
Со уго туж ӟеч тодэ:
Куке эшъёс котьку ӵош
Но висказы уз лу мур гож,
Соосты шуг вормыны,
Зӥбыны,ултӥяны.
Вордӥськем шаерелы
Вордӥськем шаере,
Сяськаё музъеме.
Тон мынам атае,
Муспотон анае.
Возь вылысь сяськаед,
Мылкыдэз лӧпкытэ.
Ошмес ву юзматэ.
Нюлэсэд утялтэ.
Палэнэ кошкисько —
Тынэсьтыд мӧзмисько.
Котькуд уй но нунал
Тон сярысь малпасько.
Сюлмысьтым гажасько,
Утьыны тыршисько.
Азинлык сӥзисько,
Ӟечезлы оскисько.
Мынам школае
Кызьпуос лэйкало азбарын —
Со мынам школае.
Сяська зын лӧсъяське котырын —
Со мынам школае.
Вазь ӵукна жин! вазе,
Ас дораз со ӧте.
Трос эшъёс, шумпотон —
Со мынам школае.
Сӥзисько шуд но дан,
Муспотон школае.
Малы меда?
Тодӥсько, уд кошкы мон дорысь,
Косӥ ке, мукетсэ быръёд.
Тон тод, кезьыт пеймыт уйысь,
Ӟырдыт нылаш сюлме тон весяклы кылёд.
Шурдыт луса азьло малпай ни мон:
Яратонэ бездэм сяська кадь шуялоз.
Малы меда улонам лыктӥд тон,
Та гужеммы тодам ӵемгес вуылылоз.
Малы меда чагыр синдэ мон адӟисько,
Сое чылкыт инэн мон ӵошатъяй.
Малы меда 16 арам куректӥсько,
Нош ныл сюлэм, зарни сюлэм, оске ай…
Быръён
Мушъёс кадь бергало малпанъёс Натӥлэн йыраз, йырвиымзэ ик лекало. «Мар мон лэсьтӥсько? Шонер-а сюрес бырйисько? Анаен атай тазьы лэсьтэмме ноку уз валалэ. Нош бертоно ке луиз? Кызьы асме возёно? Ма кароно? Ой! Сюлмы! Вылысь Инмаре, юртты!» — сюлэмшугъяське нылаш.
Ар… Кыӵе ке огшоры ар куспын Натӥлэн улоназ бугырес воштӥськонъёс луизы: со пумитаз … нырысетӥ яратонзэ. Кинлы ке серем но потоз, дыр: Алёшаез улэ вылэм та черкогуртын ик. Огнуналэ Натӥ компьютерзэ лэзьыса, интернетэ пыриз. Ӵем гинэ со эшъёсыныз ӝытъёсы вераськылӥз, выль иворъёсты тодылӥз, выль эшъёсын тодматскылӥз. Та нуналэ со тодматскиз Лёша нимо пияшен. Нырысь вераськемысь ик нылаш шӧдӥз пияшлэсь лякыт сямзэ. Алёша та вакытэ берпум нуналъёссэ лыдӟыса улӥз армиын. Озьы ортчизы нуналъёс. Макем муспотон кылъёсын лӥятылӥз сюлэм гажанзэ пияш. Ӵыдытэк возьмаз та ӝытъёсты Натӥ. Со трос пол ас понназ малпаськылӥз: «Кызьы озьы, одӥг интыын улыса, татчыозь ог-огмес ӧм но адӟылэ вылӥськеммы.» Син азяз пуктылӥз пумиськемзэс, вераськемзэс. Кусыпсы соос вискын 5 ар. Натӥ вань улонзэ вожъяськыса улӥз агайлы. Соин ик Натӥлы Олёш луиз сюлэм эш но, агай но, улонэз валэктӥсь мурт но…
Ӝоген ортчизы толэзьёс. Тани матэктэ ини Алёшалэн бертон нуналъёсыз. Сюлэм йыгаське, кытчы пырон инты уг шедьты. Ульчаетӥ мынонъяз, кытӥ шоканэз пытсаське, кытӥ пӧсь басьтыса кошке, я вань ӟигар быре. Ум кошкиз, йыре пӧртэм малпанъёс лыкто: «Интернет пыр вераськон — со одӥг , нош кызьы меда ортчоз зэмос пумиськон. Зэм ик-а соослэн шӧдонъёссы сыӵе кужмоесь. Кулэ кароз-а Алёша школаын дышетскись, яратон дуннеын чик валасьтэм нылашез…» Сиён но уг мыны ни, ньылонэ дугдэ.
Тани туннэ бертэ Алёша. «Ӝытпал вуо Алнаше», — ивортӥз телефон пыр. Вень йылын кадь ортчиз быдэс нуналыз Натӥлэн. Йырсизэ но кӧня пумо вошъяз меда, кӧня дэрем дӥсяз. Синучкон азьын кема бергаз. Котыр ласянь кӧня пол учкиз но, дыр, ассэ….
Звонок. Натӥ телефон доры мынэмзэ ик ӧз вала ни: пыдъёс маке лябӟемын.
— Мон вуи, — вазиз трубкаын.
Нылаш кызьы потэмзэ ӧз вала. Кытысь кужым пыриз, ӟигар потӥз… Натӥ сылэ автостанциын. Тани автобусысь потӥз солдат формаен, йыг-йыг мугоро егит пияш. Лӧб-лӧб лёгиськыса, пияш вуиз Натӥ доры.
— Ӟечбур, мусое, кема возьмай мон та пумиськонэз. Табере ноку ум люкиське ини.
Натӥлэн сюлмыз капчияз. Мур лулӟиз. Соос огшап ог-огзы шоры учкыса сылӥзы. Та вакытэ нокыӵе кылъёс кулэ ӧй вал: ваньмыз гожтэмын синъёсын. Ваче учкизы инбам кадь чагыр но сьӧд сутэр синъёс. Быдэс ӝыт вераськыса потӥзы егитъёс, дырлэсь ортчемзэ ӧз шӧдэ. Инкуазь но дасяськем кадь соослэн пумиськонзылы: инбамын одӥг пилем но ӧвӧл, ымнырез небытак маялля ыркыт тӧл, бурпалан, каллен гинэ куаразэ сётыса, жильыртыса бызе шур… Тани Натӥлэн юртэз. Люкиськоно. Та ӝытэ пияш нырысьсэ небытак ӟыгыртӥз, чупаз Натӥез.
Уй. Ма таӵе кема со кыстӥське? Кӧня инмын кизилиос, сомында малпанъёс Натӥлэн йыраз: «Мыным дышетсконо, азьланьын ЕГЭ, сюлэмлы кельшись уж быръёно луоз. Нош Алёша. Со но мыным туж матын луиз ини».
Натӥ ӝытозь дышетскылӥз. Алёша — ужаз. Нош ӝытъёссэс соос кузьмаллязы ог-огзылы.
Нош одӥг нуналэ Натӥез возьмаз туж секыт вераськон. Анаез тодэм пияшлэсь школаын дышетскон аръёсыз, укылтэм воземез, йӧнтэм эшъёсыз сярысь.
— Нылы, вунэты сое. Ми тыныд азьланяз умойзэ гинэ сӥзиськом. Дышетскемез ӧвӧл. Тон аслэсьтыд пардэ шедьтод ай. Тон егит на. Соин номыр умойзэ уд адӟы.
Синазьыз сьӧдэктӥз, ымнырыз кӧсэктӥз Натӥлэн. Маке вазьыны анаезлы та вакытэ со ӧз ни быгыты.
Та вераськон сярысь Алёшалы со номыр но ӧз вера. Быгатэмзыя пумиськылӥзы. Кытӥ но отӥ Натӥлы алдаськоно но луылӥз. Ӝоген эшшо одӥг ивор Натӥлэсь вань ӟигарзэ быдтӥз: Алёша кошке Самарае: коньдоно уж шедьтэм. Пияш валэктиз:
— Туннэ нуналэ уксётэк улыны секыт. Ма быгато, лэсьто, бӧрысь ивор сёто.
Ортчиз Выль ар. Алёша котькуд толэзь берталляз. Та шер пумиськонъёсын гинэ улӥз Натӥ. Дышетсконэз сярысь ӧз вунэты.
Тани сётэмын ини экзаменъёс. Анай-атаезлы вератэк, нылаш пыриз Самарае, финансовой институтэ но Ижкарысь Удмурт кун университетысь юридической факультетаз.
Натӥ железнодорожной вокзалын. Табере со азьын бадӟым быръён. Одӥг вамыш лэсьтоно. Пыдъёс уг вырӟо. Юртты, Инмаре! Ма каром? Билет басьтэмын Иже но, Самарае но.
Тани нылкышно куара ивортӥз:
— Отправляется поезд «Ижевск-Самара. Просим пассажиров занять свои места.
Сюлмыз шымырскиз Натӥлэн. Куалекъясь киосыныз сумкаяз пыриз… Мар адӟон та? Сумка пась! Кин ке усьтэм! Кытын янчике? Билетъёсы отын ук! Пӧсьвуам кадь луиз егит ныл…
Огшап пукиз на Натӥ интыяз. Али йыраз нокыӵе малпанъёс ӧй ни вал. «Инмаре, тазьы вазид шат мыным», — малпаз со ас понназ.
София Чиркова (Глаз ёрос, Пусошур гурт)
ЛЕГЕНДА
Пусошур гуртын улӥсько,
Со сярысь ичи тодӥсько.
Мылкыд кари тодыны,
Со сярысь визь-нод люканы.
Песянае лоры лыктӥ,
Солы лякыт вазьылӥ.
Песянае мыным дуно,
Туж мусо но тунсыко.
«Ӵужапие, вера ай, малы
Пусошур нимамын гуртмы?
Тон мынам туж визьмо,
Ваньмызлы со тодмо».
«Пуксьы ай вӧзам, нылы,
Дасяськы сак кылзыны.
Кытын ке паськыт лудын,
Тём-пеймыт нюлэс дурын,
Шур бызиз жильыртыса,
Инкуазез шулдыртыса.
Пӧйшуръёс но вал уно,
Вуэз чылкыт, чорыго.
Писпуос но ӝужытэсь,
Адӟисько батыр кадесь.
Вӧлмытско сяська зынъёс,
Лобало пӧртэм бурдоос.
Кылӥсько трос куараос,
Паймытӥсь луо соос.
Татӥ ортчиз адями,
Данъямон со вал вузчи.
Трос котыръяз дуннеез,
Гуртэзлэсь ӧй вал дуноез.
Мурт сюресэз со лёгаз,
Мурт сямъёсты со валаз,
Мурт кылэз дышетӥз
Но гуртаз вуыны быгатӥз.
Шур дурез адӟыса,
Улӥз кема паймыса.
Ӧз адӟылы сыӵеез:
Чебер, узыр интыез.
Васькем шур дуре ӝогак
Но учкем котырак.
Солы ваньмыз ярам,
Татчы кыльыны малпам.
Ӧз жаля озьы каремзэ,
Улон интызэ быръемзэ.
Ваньмыз луэм сюлэмъя,
Аслаз малпамезъя.
Калык улэм радызъя,
Вашкала-вашкала кабъёсъя.
Шурзы интыен пусъемын:
Кинлы кыӵеез тупамын.
Озьы туж шонер малпаллям,
Чорыган интыос висъяллям.
Соин тупаса улӥллям,
Калыкъёс ог-огзэс валаллям.
КЫЛБУРЪЁС
Весь малпаськисько,
Инме лобыны турттӥсько.
Трос дыръёс ортчыса,
Ёрмон пӧлы выйыса,
Тон сярысь малпанэ
Омыр кадь ик кулэ,
Нуналысь нуналэ
Эркын потэ улэме.
* * *
Тон уд адӟы ни, уд кылы —
Тон пӧрмемын.
Вылӥе тубемдэ
Шӧдыса ми улӥм.
Милемды уд тодмаськы,
Палэнтӥ ортчиськод.
Ӵок, кулэ дыръяз
Ӝог гинэ лыктод.
ШУГ-СЕКЫТ
Шуг-секытэ ке вуэ адями,
Соку со кутске валаны,
Кызьы вормоно секытэз,
Кужмысь солы султонэз.
Адямилэн кужмыз уг тырмылы,
Адямилэн чидан калэз пӧсьтэ,
Соин, лэся, со куректэ
Куддыр бырон калэ вуэ.
Адямилы огнын туж шуг,
Куректыны шедьтэ со муг.
Одно ик эш солы кулэ,
Кенешъёсын со буйгатэ.
Котьку лякыт ӵошен,
Ку лэсьтӥське ваньмыз дэмен.
Дыр гинэ но ӝог ортче,
Улон шулдыр сяськаяське.
УЛОНЭЗ ЯРАТОН
Яратӥсько та улонэз —
Куректытэк будэмез,
Яркыт пиштӥсь шундыез,
Сиосызлэсь ворекъямзэс.
Чылкыт бызись шуръёсты,
Вуазы пыласькись юсьёсты,
Вож сылӥсь нюлэсъёсты,
Жингрес уӵы гуръёсты.
Пумтэм-йылтэм сюресъёсты,
Сяськаяськись луд вылъёсты.
Вуын адскись инбамез,
Юг-юг пиштӥсь толэзез.
Шунды пуксемез учкыны,
Выль нуналэз кутскыны.
Ӟеч ужъёсты лэсьтыны,
Улон сюресме вьльдыны.
ЯРАТЫСА
Сонет
Яратыса, шумпотӥсько.
Яратыса, юн мӧзмисько.
Яратыса, чеберскисько.
Яратыса, юн кышкасько.
Куке монэ со аналтоз,
Куке жингыртытэк кельтоз,
Куке нош йыркурзэ лэзёз —
Монэ ултӥяса возёз.
Выросъёссэ мон чидало,
Из сюлэмзэ небыт шунто,
Юн ӟыгырто мугорзэ,
Чупало ческыт ымдурзэ.
Котьку бордаз улэме потэ,
Сюри, лэся, яратон вотэсэ.
КУАРТОЛЭЗЬЛЭН КУТСКОНАЗ
ВЕРОС
Тулыс туэ ми доры ӝегатскыса вуиз. Толлэн огшоры сётскемез ӧз поты, нюръяськемез, аслэсьтыз кужымзэ возьматэмез потӥз. Лымы шунам бере ик инмысь бадӟым лымы пырыос усьылӥзы на. Ӵукна султыса, укное учкид ке, одно ик толалтэ вуиз шуыса малпалод. Куазь оштолэзьлэн пумаз гинэ тупатскиз.
Кутскиз инкуазьлэн вож дырыз — куартолэзь. Музъем но кӧсаны кутскиз, писпуос вылын пучыос быгыльскизы. Шунды но вылӥе-вылӥе тубе, лекгес но лекгес шунтыны кутске. Гурт калык бакчаосаз выжы лэзиз кожалод: вазь ӵукнаысен бер ӝытозь музъемын пырскыса уло. Куартолэзьлэн одӥгаз нуналаз адямиос уж пӧлы выйизы: кин бакча котырын выре, кин ке юртъерзэ тупатъя.
Мон но атаелы юрттыса улӥ. Кӧня ке дыр ортчыса, омырын курыт ӵын зын шӧдӥськиз. Нюлэс но бусы пала учким но адӟиськом: тыл аслаз лек кужыменыз кӧс турынэз но, ӝужыт писпуосты но вормыны кутскиз, тӧласькыса эшшо но лекоме.
Атаеным кема малпаськытэк, трактор борды герымес думим но бусы пала шонтӥм. Тыл котыр вӧлдӥське, нюлэс пушкы но вуиз. Пумен гурт калык но, тыл кысӥсь машина но вуизы. Ми нош со дыръя нюлэс пушез гырыны кутским. Тыл милемды эгесаз, кутыны малпа, лэся — ми сьӧры уйиське, писпуосты погыръя. Дауръем пужымъёс но кызъёс ӧжыт гинэ уг усьыло. Кышкыт. Сюлэм дырекъя. Атаелэсь вань веранъёссэ быдэстыны тыршисько. Тыл сэрен шоканы но секыт луиз, пӧсьлэсь кезьыт вуэ пырем потэ гинэ. Каллен тылэз вормим. Нош ик инкуазь но адямиос нюръяськизы. Кыӵе шумпотон вал гуртмылы. Нош мон понна кык полэс. Гурт калык данъяськыса учкиз, ку монэ но атайме бадӟым пайдаё ужмы понна ушъязы. Та нуналэз мон ноку но уг вунэты.
УДМУРТЛЫК
СОЧИНЕНИЕ-ЭССЕ
«Мар со удмуртлык?» — юалоз тодӥсьтэм мурт. Нош тӥ мае вералоды? Та юанлы шуг сётыны валэктон, зэмос удмурт ке тон уд луиськы. Нош зэмос удмуртъёс пумен быро ӟучомо, бадӟым городъёсы кошко, удмурт кылын но вераськыны уг дӥсьто — возьдасько .
Нош мон понна удмуртлык — со быдэс Удмуртия: солэн историез, культураез, кылыз, калыкез, калыклэн аслэсьтыз пуш дуннезэ валамез, шӧдэмез. Ӟуч кылъя но литературая дышетӥсьмы котьку но ушъя удмурт кылэз, пайме солэн чеберезлы.
Нош кыӵе паймымон шаермылэн историез! Котькуд гуртлэн кылдэмез сярысь калыкын легендаос малпамын. Соос али ке но пересьёслэсь егитъёслы вуттӥсько. Котькуд гурт маин ке но висъяське, солэн аспӧртэмлыко сямъёсыз но йылолъёсыз, но ваньмызлэн маиз ке но огъясез вань.
Удмурт шаер бадӟым ӧвӧл ке но, татын висъясько уйпал но лымшор ёросъёс. Токма уг нимало соосты Бенъёс но Бонъёс.
Удмуртъёс туж возьдаськисесь, дӥсьтӥсьтэмесь, ужасесь. Кӧня узырлык кельтӥз но кельтэ асьме калыкмы будӥсь иылпиосызлы: крезьгуръёс, кырӟанъёс, фолклор. Но востэм луэменыз быдэс дунне шоры удмуртъёс уг верало: «Тӥни ми кыӵеесь! Ми — удмуртъёс!» Мон малпасько, та бордын ик милям менталитетмы — удмуртлыкмы.
Александра Шкляева (Эгра ёрос, Тупал-Пурга гурт)
Яратӥсько мон тонэ
Лыз буёло синъёсад учкыса,
Усто ужась киостэ кутыло.
«Яратӥсько мон тонэ,» — вазьыса,
Небыт гинэ бамъёсад чупало.
Пуксё бордад, киыным ӟыгырто,
Потэм векчи синвудэ ӵушыло,
Котькуд юртто, сюлэмдэ утьыло…
«Яратӥсько мон тонэ!» — шуыло.
Яратонэ — Костик
Вань мынам яратонэ,
Со сярысь верам потэ.
Котьмарлэсь мыным дуно,
Котькинлэсь потэ мусо.
Туж чебер солэн синъёс.
Пӧртэмесь луо соос:
Вож но, горд но ӝуало…
Ваньмыз учкыса паймо.
Лыктэ, пуксе пыдъёс вылэ —
Секыт мылкыд ӝогак быре,
Выль шуд лыктэ, сюлмам пыре,
Быдэс лулме буйгатэ.
Бертӥсько гуртам — азе
Ӵуштырак гинэ бызе.
Кошкисько дышетскыны —
Туж тырше со келяны.
Кема ӧвӧл ке бертэме,
Сюлэмыз солэн мӧзме.
Яратоно мынам эше —
Костик нимо коӵыше.
Вазь ӵукна мон султо,
Шыпыт гинэ пото ӧс сьӧры.
Нокин уз шӧды
Потэмме.
Ваньзы кӧлозы.
Озьыен улон но ортче:
Адямиос
Валатэк бырыло.
Тросэзлэн кулэмзэс
Адӟонтэм кельтозы.
Легенда
Вылэм со кемалась-кемалась аръёсы. Та веранэз мон кылӥ аслам песянаелэсь.
Удмурт семья лыктӥз гурезь баме гуртсэс интыяны. Интыяськизы ни удмуртъёс, гуртсэс но ӝутӥзы, нош гуртсылэн нимыз ӧй вал.
Одӥг нуналазы та интыостӥ юн пельскем ортчем, пурга вылэм. Уно юртъёстӥ лымыятӥз. Удмуртъёс соку, кема малпатэк, нимазы гуртсэс Тыпал — Пурга.
Нош малы Тыпал? Та гурезь йылын вашкала дыръёсы ты вылэм. Нош бӧрысьгес со Ита шуре кошкем. Соин ик «Тыпал» ты палъёс шуэмез возьматэ.
Аръёс ортчемъя, гуртлэн нимыз кӧнялы ке гинэ воштӥськиз на — Тупал-Пурга нимо луиз.
Озьыен, кылдӥз дунне вылын мынам гуртэ.
Эн сӧре!
Турын силы но сётӥське инты,
Интыез вань котькуд тылсилэн.
Но сюлэмысь потӥсь тылсиосты
Туж унозэ кыре уг лу поттэм.
В. Шибанов.
Выльысь но выльысь инкуазь чортэ милемды шутэтскыны. Трос пӧртэм адямиос, кылсярысь, губиясьёс, чорыгасьёс, ветлыло шаеретӥ но адӟо чебер интыосты: нюлэсъёсты, шуръёсты, ошмесъёсты… Сомында сайкыт малпанъёс пуко йырамы, но ми вунэтӥськом, кытын ми, мар лэсьтӥськом. Уд но шӧды, кызьы сӧрод инкуазез.
Лыктӥд нюлэскы, пуксид сиськыны — куштӥд куш вылэ банказэ, пакетсэ. Юид, кылсярысь лимонад, — одно ик шуккод соин писпуэ. Вань пиялаос пазьгиськозы куш вылтӥ, нош тыныд серем. Со вакытэ тон уд но вала, макем вӧсь луэ писпуослы. Нош бӧрдыса кылё пӧйшуръёс но, кудъёсыз ветлылӥзы та пиялаос вылтӥ. Соос бырыны но шедё. Ваньзэ тае ми кариськом! Кӧня учыръёсты возьмато, ку ӟичыос, ӵушъялъёс пыраллязы банкаосы но потыны ӧз ни быгатэ. Нош милям ёросын вал сыӵе учыр, ку койык лёгиськыса консервной банка вылэ, вандӥз пыдзэ но кулӥз.
Нош кӧня езъёс, гозыос кыстасько сикъёсын… Пӧйшуръёс тугаськыло отчы но бырыло. Чилекъяку но ез шеде ке, нюлэс ӝуаса быре. Улонысь соку пӧйшуръёс но, тылобурдоос но, турын-куарьёс но кошко. Нош жагдоръёс? Кӧня отысь пӧртэм усыкмон газъёс пото! Чылкыт омырез но кырсёмыто, тэльёсты но быронлы вуттыло.
Кӧня синмаськымон интыосты но малпанъёсты ми быдтӥм? Кӧня улонъёсты нуизы милям ужъёсмы? Ваньмыз со — милям янгышмы.
Эшъёс! Дунне но солэн чеберез уг быро азбаръёсады. Яратыса инкуазез, утелэ сое, кызьы утиськоды анайёстэс. Бырыны шедем интыос уз но ӝутске ни выльысь, милем нокытчы луоз шулдыръяськыны но шутэтскыны ветлыны. Эн тӥялэ инкуазьлэсь улонзэ но соин ӵош асьтэлэсь. Улэ шудо. Вамышъялэ дуннеетӥ капчи, Ф. Васильев кадь ик:
Вамышъясько вордскем палтӥ,
Кузё-ачим.
Ачим ик учкисько.
Вань шаерез мон ӟыгыртӥ,
Шумпотыса капчи вамышъясько.
Понэ йырады — тӥ кузёос! Эн сӧре инкуазез! Шудо улон кияды.
Коӵышпи
Коӵышпи. Улонлэн ненег пиез. Бен, кин-о быгатӥз тузыны сое ураме? Кин-о лултэк но сюлэмтэк?
Та мусо коӵышпи, чагем синъёсыныз учкыса, пуке ӧс сьӧрын. Урамын зоре! Солы юрттоно! Нош мар лэсьтоз 15 аресъем нылаш, пукыса урокын но учкыса укное, кытын та эрке коӵыш котме зор улын. Солэн потэмез но уз луы! Мар шуод на школае пыртон сярысь? Малы-о соос уг валало? Коӵышпи быроз ук отын!
Нош пичи коӵышпи, кӧня ке пукыса, вамыштӥз кын асфальт вылэ. Со мынӥз зоро сӥньысъёс куспетӥ. Кытчы? Со ачиз гинэ тодэ…
Ныллэн потӥзы куронтэм синкылиосыз. Нош кызьы-о ужез? Оло кельтыны ваньзэ но пегӟыны коӵыш доры? Юрттыны инкуазьлэн муспотон пиезлы? Нош кызьы? Кызьы сое лэсьтыны? Дышетӥсез уз но вала, уз лэзьы урокысь. Бен, кызьы-о ӵошатыны пичи коӵышпиез зор улын кыӵе ке урокен? Озьы ке но, пукыса но малпаса гинэ номыриз но уз воштӥськы!
Потыса асфальт вылэ, коӵышпи пог кадь ик луиз, питыра кадь потэ ни. Нош зор золгес кисьтыны ӧдъяз. Бадӟым пукись вуос люкето пичиелы вамышъяны. Адямиос ветло но уг кадь адӟо коӵышпиез. Нокинлы но со ӧвӧл кулэ. Кин солы юрттоз?!
Нылаш сумкаяз книгаосты ӝогак донгыса, паймем дышетӥсьлы тетрадьзэ сётӥз но потӥз кабинетысь. Эшъёсыз абдраса учкизы со бӧрсьы, нош ныллэн йыраз соку та пичи кылдос гинэ кылиз на вал. Со потӥз ураме, пельпум вылаз гинэ куртказэ дӥсяса, но адӟиз сое. Коӵышпи пукиз зор улын кесяськыса, нош сое озьы ик нокин но адӟем но ӧз кары. Нылмурт кутӥз пичизэ кияз. Соиз кышкаса котыр учкыны кутскиз но эшшо золгес кесяськыны ӧдъяз. Нош нылаш кылдосэз ӟыгыртӥз но гуртаз вамыштӥз.
Туннэ но уло соос ӵош. Коӵышлы Зорпи ним сётизы. Нош урам кузя зор ортчыны кутске ке, коӵыш ӟуштырак гинэ бызе ас кузёез доры но тау карыса кадь мургетэ юрттэмез понна.
Елизавета Шихова (Вавож ёрос, Зямбай гурт)
Мон — Мадам,
Чагыр инбам мынам Кузь дэреме.
Мынам серекъяме —
Шунды, кудӥз тыныд югдэ.
Нош вузэме мынам
Зоръёс но чилекъя.
Льӧль малпанъёс — зарезь…
Нош кошкемез — со ву,
Кудзэ уд берыкты ноку.
Вань на толэзь —
Мынам бадӟым яратонэ,
Сое адӟид ке, тодад вай монэ.
Инмысь ӵошатске со сюлэмен нокуц
Быдӟалаен нояркытэн, тон тод сое котьку.
Ведь, мон — Мадам,
Нош тон кытын меда, Адам?
* * *
Ыш…
Коӵыш гижыоссэ шере.
Дырекъясько…
Сюлэм пыдсы дунне вые.
Мон тодӧсько…
Тонэн ум луэ ни ӵошен.
Но паймисько…
Кыӵе луэ вылэм сюлэм.
Малпаськисько…
Куддыр, улон сярысь.
Но ышисько…
Вуюисьлэн буёлъёсаз ӵемысь.
Вунэтӥсько ини…
Яркыт кизилимес инмысь.
Аслым шыпыртӧсько на…
Тон вунэт ини со сярысь!
Ыш…
* * *
Кин люкам «Кыллюкам»?
Кин люканы кыл малпам?
Кыл люкам но «Кыллэкам»
Со поттэм. Умой малпам.
* * *
Асьмемыз люкизы
Сьӧд куашкам пилемъёс,
Йырвизьмес ӵоксазы
Секытэсь малпанъёс.
Уг ни кырӟа шырчик,
Вазь ӵукна султыса,
Кылизы ӝытъёсмы,
Сэлэммес бышкыса.
Кузь кылъёс яратонмес
Куспетӥ каризы,
Вал на кидыс
Но сое быдтӥзы.
Дыр ортчиз но,
Сюлэм но кысӥз кадь пумен.
Нош шокчем капчиен
Уг ни луы гуртын… возьытэн.
* * *
Кыдёкын, кыдёкын
Шур дурын, ваче Ки кутскыса,
Гольык пыд бызьылӥм.
Шуныт тӧл асьмелэсь
Йырсимес маялляз,
Инбамтӥ, эсьмаса,
Тӧдьы вал уялляз.
Но пумен быризы
Пичи льӧльдыръёсы,
Секытсэ ваизы
Пеймытэсь уйёсмы.
Сьӧд коӵыш кадь ортчиз
Вань улон шокчемен,
Пурысьтаз ни йырси,
Пересьмим ми тонэн.
