Соос фотографиен выро, спортэн эшъясько но тунсыко флешмобъёс ортчытъяло. (Флешмоб сярысь 3–4‑тӥ номерысь лыдӟыны луонлыкты вань). «Майкл Джексон жив», «Весенний дримфлэш», «Водное мочилово», «Слияние к шару», «Новогодние обнимашки», «Посиделки на траве» — вань та ужрадъёс пиослэн кичӧлтэмзыя ортчытэмын вал. Котькуд флешмобе пиос 500‑лэсь ятыр егитъёсты бичало. Соос быгато калыкез ас доразы кыскыны. Нош кыӵе соослэн «секрет успеха» шуонзы? «Ваньмыз кутске пальпотонысен», — шуо пиос.
Пичи дыр — шудо дыр
Женя пичи дырзэ ӵемысь тодаз вайылэ. «Школаын мон «пурысь шырпи» вал, нокыӵе ужрадъёсы но ӧй пыриськылы. Ваньмон дырме быдэсак дышетсконлы сӥзисько вал. Соин ик огнам гинэ классысьтым школаез витьёсын но ньыльёсын быдтӥ». Со пияшлэн нырысетӥ вормонэ вал, дыр.
Нош Дима, Женяен ӵошатыса, уг яраты вал дышетскыны, школае ветлыны. Кызьы но озьы сое быдтэм бераз пияш фотографиен тунсыкъяськыны кутскиз, вань ваньмон дырзэ солы висъяз. Собере, УдГУ-э пырыса, Димаез модельной уже ӧтизы. Пияш университетысь модельной школаез быдтӥз, пӧртэм фестивальёсы но конкурсъёсы пыриськылӥз. Али но со фотографиен герӟаськемын. «Та уже сюдэ монэ», — шуэ пияш.
Весяклы ӵош
«Димаен ми тодматским 2009‑тӥ арын, со соку флешмобъёсы пыриське ни вал».
«Мон фотограф луыса ужасько вал отын», — вера Дима. «Соосын ӵош мон но ужрад ортчытонэ пыриськи, мыным кельшиз. Собере толалтэ эшшо одӥгез вал. Со дырысен ми Димаен ужаськом ни, котьку но котькытын ӵош».
Тодматскон
«Флешмоб сярысь мон нырысьсэ тодӥ философияя урокын» — тодаз вае Женя. Монтажной техникумын дышетскыкуз, солэн мукет тунсыкъяськонъёсыз вал. Та сярысь кылыса но, со пеляз ӧз поны. Собере, кӧня ке дыр ортчыса, Интернет пыр флешмобен тодматскиз. Нош Дима тодӥз эшъёсыз пыр, соос кема аръёс ӵоже флешмобъёс ортчытъяло вал ни. Нырысь пияш туспуктылыса гинэ ветлӥз, собере ачиз но та выллем ужрадъёсты радъян борды басьтӥськиз.
Флешмоб
Флешмоблэн валтӥсь ужпумез — трос адямиосты огазеян, соос пӧлын эшъяськон кусыпъёсты юнматон. Пиос но та бордын туж зол ужало. «Нырысь кышкано кадь, таӵе трос но пӧртэм егитъёсын ужано.
Но собере дышиськод ни – трос кужым но умой мылкыд соослэсь басьтӥськод, озьы ик выль адямиосын тодматскиськод» – шуэ Женя.
Тунсыко учыръёс
2009-тӥ арын, толшоре «good shoot» нимо флешмоб ортчиз. Урамын 25 градус кезьыт вал ке но, калык бичаськиз. Ми бызьылӥм, лымыын погылляським, ваньмызлы кельшиз, нокин но ӧз кынмы. Ваньмыз со шуныт кусыпъёслы луыса, дыр, шуэ Женя.
«Free hugs»– таиз тужгес но яркытэз вал, 100-лэсь ятыр адямиос яркыт дӥсен но табличкаосын ульчаостӥ ветлӥзы, «Водное мочилово» — котькуд ар ортче, таиз самой кот ужрад, егитъёс фонтанын пыласько. Таиз тужгес но кельше егитъёслы, тросэзлэн социальной герӟетъёсын статус пуктэмын луэ, самой умой флэшмоб шуыса. Талы туж шумпотоно».
«Мыным «Bang» нимо флешмоб тужгес но сюлмам пыриз. Со нырысетӥез вал. Ми 150 банан басьтӥм, но соосын лэзьяськыны кутским, собере ваньмы ӵош музъем вылэ усимы. Тӥни сыӵеез но вал», — тодаз вае Дима.
Пиос выль малпанъёсты ӵемгес Интернетысь басьто. Весь выльзэ малпаны дыр но уг тырмы. Озьы ке но котькудӥз ужрад аспӧртэмлыко но тунсыко пӧрме. «Флешмоб — выль улон, сое ортчытыса, бадӟым кужым басьтӥськод, адямиослэсь пальпотонзэс адӟыса шумпотӥськод, но эшшо но эшшо выль ужрадъёс ортчытъятэм потэ», — верало пиос.
Азьланяз но Дима но Женя выль тунсыко ужпумъёсты азьпала пукто. Нырысь ик ужрадъёсазы кунгож сьӧрысь вуэм егитъёсты кыскыны, калыккуспо флешмобъёс ортчытъяны.
Мон ачим но соослэсь ужрадъёссэс котьку витьыса возьмасько, отын шутэтскыны но, выль тунсыко адямиосын но тодматскыны луэ. Соос тодо уго, та дуннеез кызьы яркытгес карыны!
